पुस १७, काठमाडौं । सोमबार बिहान साढे ४ बजे काठमाडौंको लैनचौरमा बा९० प १४०० नम्बरको मोटरसाईकल आफै अनियन्त्रित भई सकड पेटीमा ठक्कर खाई दुर्घटना हुँदा चालकको मृत्यु भएको छ ।
मृत्यु हुनेमा बाग्लुङ घर भई हाल बोहोराटार बस्ने २५ वर्षीय साजन ठकुरी रहेका छन् । दुर्घटनामा गम्भीर घाइते भएका ठकुरीको उपचारको क्रममा बिहान सवा ५ बजे शिक्षण अस्पताल महाराजगंजमा मृत्यु भएको हो ।
यस्तै आइतबार साँझ ६ बजे भक्तपुरको मध्यपुर ठिमी नगरपालिका–३ गठ्ठाघरमा बा ४ ख ९३९१ नम्बरको बसले बा५५प १०९८ नम्बरको मोटरसाईकललाई ठक्कर दिँदा भएको दुर्घटनामा मोटरसाईकल चालकको मृत्यु भएको छ ।
मृत्यु हुनेमा रामेछाप दोरम्बा–५ का २० वर्षीय देवेन्द्र खड्का रहेका छन् । घाईते खड्काको उपचारको क्रममा नागरिक अस्पताल गठ्ठाघरमा साँझ साढे ६ बजे मृत्यु भएको हो । दुर्घटनामा संलग्न दुवै सवारी साधनलाई प्रहरी वृत्त ठिमीले नियन्त्रणमा लिएको छ ।
