काठमाण्डौ, ५ साउन– भोली शनिबार काठमाण्डु र ललितपुरमा १० घण्टा विद्युत सेवा बन्द हुने भएको छ । बिहान साढे ८ बजेदेखि अपराह्न साढे ४ बजेसम्म दुई जिल्लाका विभन्न स्थानमा विद्युत सेवा प्रभावित हुने नेपाल विद्युत प्राधिकरणले जानकारी दिएको छ ।
टेकु सबस्टेसन स्तरोन्नतीका लागि प्रथम चरणको निर्माण कार्य सम्पन्न गर्न विद्यमान इनकमर प्यानल तथा दुईमध्ये एक पावर ट्रान्सफर्मर बन्द गर्नुपर्ने भएकाले सेवा प्रभावित हुने प्राधिकरणले बताएको छ ।
उक्त सबस्टेसनबाट आपूर्ति भइरहेका फिडरहरूमा मात्र सेवा प्रभावित हुने प्राधिकरणले जानकारी दिएको छ । बागमती फिडरअन्तर्गतका सानेपा राम मन्दिर, गुसिगाल, एडभान्स कलेज, अमरावती, सानेपा मोड र रेडिएण्ड स्कुल क्षेत्रमा विद्युत प्रभावित हुने प्राधिकरणले जानकारी छ ।
पुल्चोक फिडरअन्तर्गत बल्खु, झम्सीखेल, पुल्चोक र ठाडोढुंगा क्षेत्रमा विद्युत प्रभावित हुने प्राधिकरणद्वारा शुक्रबार जारी सूचनामा उल्लेख छ ।
यस्तै चमती फिडरअन्तर्गत ज्ञानतीर्थ मार्ग कालीमाटी सालिक चोक, छाउनी, डल्लु, बिजेश्वरी, स्वयम्भू, चमती, किमडोल र बारूदखाना क्षेत्र, कीर्तिपुर फिडर अन्तर्गतका बल्खु, खसीबजार, त्रिभवुन विश्वविद्यालय, चोभार, टौदह र ट्यांलाफाँटका केही क्षेत्रमा विद्युत् प्रभावित हुने प्राधिकरणले जनाएको छ।
यस्तै त्रिपुरेश्वर फिडरअन्तर्गतका टेकूदेखि पचली भैरव, उद्योग वाणिज्य संघ हुँदै सुकुम्बासी वस्ती, वर्ल्ड ट्रेड सेन्टर तथा थापाथली स्विचिङ अन्तर्गतका टेकुदेखि त्रिपुरेश्वर चोकसम्म, आशा अस्पताल, वर्ल्ड ट्रेड सेन्टर, रंगशाला, नर्भिक अस्पताल, प्रसूति गृह हुँदै बबरमहलसम्म, सेनपा, कुपन्डोल, स्थानीय विकास मन्त्रालय र पुल्चोक क्याम्पसम्म विद्युत् प्रभावित हुने छ।
प्राधिकरणका अनुसार भैसेपाटी फिडर अन्तर्गत महतो मार्ग, भैँसेपाटी आवास, भैँसेपाटी चोक र एकल डाँडा तथा क्षेत्रपाटी फिडर अन्तर्गतका टेकुदेखि विष्णुमती खोला किनार हुँदै पुष्पलाल पार्क र ढल्कु चोकदेखि क्षेत्रपाटीसम्म विद्युत् सेवा अवरूद्ध हुनेछ ।
प्राधिकरणले ती क्षेत्रहरूमा वैकल्पिक व्यवस्थाबाट विद्युत् आपूर्ति कम प्रभावित हुने गरी सबै फिडरमा नियमित विद्युत् आपूर्तिको प्रयास गरिने र निर्धारित समयअघि काम सकिए लाइन सुचारू गर्ने जानकारी पनि दिएको छ ।