राष्ट्रपति रामचन्द्र पौडेललाई नेपाल चेम्बर अफ कमर्सको प्रतिनिधिमण्डलले बधाई एवं सफल कार्यकालको शुभकामना व्यक्त गरेको छ।
शीतलनिवासस्थित राष्ट्रपति कार्यालयमा पुगी राष्ट्रपति पौडेललाई चेम्बर अध्यक्ष राजेन्द्र मल्लसहितको प्रतिनिधिमण्डलले बिहीबार बधाई एवं शुभकामना दिएको हो।
चेम्बर पदाधिकारीसँगको भेटमा राष्ट्रपति पौडेले मुलुकको वर्तमान आर्थिक अवस्थाले आफूलाई चिन्तित बनाएको बताए। जोखिमयुक्त आर्थिक अवस्थालाई ध्यानमा राखेर सबैले आ–आफ्नो क्षेत्रबाट जिम्मेवारी बहन गर्नुपर्ने उनको भनाइ छ।
उनले वर्तमान आर्थिक संकट समाधनका लागि सरकार र निजी क्षेत्र मिलेर काम गर्नुपर्ने पनि बताए। मुलुकभित्र उत्पादन वृद्धि एवं रोजगारी सिर्जना गरेर आत्मनिर्भर अर्थतन्त्र निर्माण गर्नुपर्नेमा राष्ट्रपतिको जोड थियो।
भेटका क्रममा चेम्बर अध्यक्ष मल्लले आर्थिक विकास र समृद्धिका लागि राष्ट्रपतिबाट पथप्रर्दशन हुनेमा आफूहरु विश्वस्त रहेको बताए। उनले पुँजीगत खर्च हुन नसक्ने समस्यालगायतले आर्थिक गतिविधि सामान्य अवस्थामा फर्किन नसकेको बताएको चेम्बरले जनाएको छ।