डलरको सटही दर २६४ पाकिस्तानी रुपैयाँ पुगेसँगै पाकिस्तानी मुद्रा इतिहासकै सबैभन्दा कमजोर

आज एक अमेरिकी डलरको सटही दर २६४ पाकिस्तानी रुपैयाँ पुगेसँगै पाकिस्तानी मुद्रा इतिहासकै सबैभन्दा कमजोर मुद्रा भएको हो।

हिजोको तुलनामा आज पाकिस्तानी मुद्राको मूल्यमा ३.३६ प्रतिशतले गिरावट भएको हो। बढ्दो महँगी र वैदेशिक मुद्राको सञ्चितिमा कमी भएकाले अमेरिकी डलरको तुलनामा पाकिस्तानी मुद्रा कमजोर बनेको हो । विदेशी मुद्राको सञ्चिति कम भएपछि र डलर बलियो हुन थालेपछि एक्सचेन्ज कम्पनीज एसोसियशन अफ पाकिस्तानले डलरको भाउ स्थिर राख्ने प्रयास गरेको थियो । सरकारले पनि बजारमा देखिएको अराजकता नियन्त्रणका लागि भन्दै अन्तरबैंक दर स्थिर राखेको थियो ।

एक्सचेन्ज कम्पनीले कालोबजारी, अन्तरबैंक र खुलाबजारमा देखिएको भाउको अन्तर अन्त्य गर्ने आफूहरूको उद्देश्य भएको जनाएका थिए । पाकिस्तानी अर्थमन्त्री इसहाक डारले नियुक्ति लगत्तै डलरको मूल्य दुई सय रुपैयाँभन्दा नबढ्ने दाबी गरेका थिए । तर निरन्तर ओह्रालो लाग्दै पाकिस्तानी मुद्रा इतिहासकै कमजोर बनेको बीबीसी हिन्दीको खबरमा उल्लेख छ ।