प्रमुख प्रशासकीय अधिकृतको सरकारी निवासमा कैलालीको घोडाघोडी नगरपालिकामा एक जना वडाध्यक्षले तोडफोड गरेका छन् ।
प्रमुख प्रशासकीय अधिकृत दिपककुमार आचार्यको सरकारी निवासमा शनिबार राति मेयर खड्कबहादुर रावतसहित केही वडाका वडाध्यक्षले मदिरा सेवन गरेका थिए । सोही क्रममा आपसमा विवाद हुँदा उनीहरुबीच हात हालाहालसम्मको अवस्था सिर्जना भएको थियो ।
मेयर रावत र प्रमुख प्रशासकीय अधिकृत आचार्यबीच विवाद हुँदा वडानम्बर १ का वडाध्यक्ष घनश्याम ओझाले लात्ताले प्रहार गरेपछि टेबुल फुटेका छन् ।
घटनाबारे आधिकारीक रुपमा जानकारी प्राप्त नभए पनि नगरपालिकाका प्रशासकीय अधिकृतको निवासमा मदिरा सेवनपछि वादविवाद भएको सुनिएको इलाका प्रहरी कार्यालय सुखडका प्रमुख प्रहरी नायब उपरीक्षक (डीएसपी) लक्ष्मण शाहीले बताए ।
वादविवादकै क्रममा प्रशासकीय अधिकृतको निवासमा रहेको टेबुलमा वडाध्यक्षले ओझाले लात्ता प्रहार गर्दा फुटेको बुझिए पनि कुनै पक्षले घटनाबारे औपचारिक रुपमा जानकारी नदिएको उनले जनाए ।
उनीहरुले सुखड बजारमा रहेको माछा घर रेष्टुरेन्टमा राति अबेरसम्म मदिरा सेवन गरेकको त्यहाँबाट निस्केर फेरि उनीहरु प्रमुख प्रशासकीय अधिकृत आचार्यको सरकारी निवासमा गएको प्रहरीले जनाएको छ ।