महानगरले सञ्चालन गरेको अनधिकृत संरचना हटाउने अभियानमा आफ्नो समर्थन रहेको काठमाडौं महानगरकी उपमेयर सुनिता डङ्गोलले स्पष्ट पारेकी छन् ।
आफ्नो साथ, सहयोग र समर्थन महानगरको कानुन कार्यान्वय गर्ने सबै कार्यमा रहेको उपमेयर डङ्गोलले बताएकी हुन् । काठमाडौं महानगरलाई साँच्चिकै स्वच्छ, सुन्दर, जीवन्त र व्यवस्थित सांस्कृतिक नगरका रूपमा थप विकास गर्ने आइतबार वक्तव्य जारी गर्दै उपमेयरडङ्गोलले आफ्नो एजेण्डा रहेको उल्लेख गर्दै त्यसबारे आफू सचेत रहेको स्मरण गराएकी छन् ।
“सार्वजनिक वा सरकारी जग्गा अतिक्रमण गरी निर्माण गरेका अनधिकृत संरचना (निर्माण कार्य तथा नक्शा स्वीकृति गर्दा भूइँतला वा बेसमेन्टलाई पार्किङको प्रयोजन देखाइपछि अन्य व्यापारिक प्रयोजनमा लगाएका संरचना) हटाउने कार्यलाई केही दिनदेखि काठमाडौं महानगरपालिकाले निरन्तरता दिँदै आएको विदितै छ”, डङ्गोलद्वारा जारी वक्तव्यमा उल्लेख छ, “त्यस्ता अनधिकृत संरचना हटाउने अभियान काठमाडौं महानगरपालिकाको हो । म काठमाडौं महानगरपालिकाको उपप्रमुखको हैसियतमा छु । त्यसैले कानुन कार्यान्वयन गर्ने सबै कार्यमा मेरो साथ, सहयोग र समर्थन रहेको स्मरण गराउन चाहन्छु ।”