स्टेट पार्टनरसीप प्रोग्राम (एसपीपी) सम्झौता तत्कालीन प्रधानमन्त्री केपी ओलीकै पालामा भएको नेकपा एकीकृत समाजवादीका अध्यक्ष माधवकुमार नेपालले दाबी गरेका छन् ।
ओली आफैंले गरेको सम्झौता अहिले थाहा छैन भनेर झुटो बोलेको अखिल नेपाल महिला संघ समाजवादीको कार्यक्रमलाई आज काठमाडौंमा सम्बोधन गर्दै नेपालले बताए । ‘केपी ओलीकै पालामा एसपीपी सम्झौता भयो, तर अहिले थाहा नै भएन भन्नुहुन्छ,’ उनले भनेका छन्, ‘कि चिन्तनमा कमजोरी कि काम गर्ने गलत छ, यसमा सुधार गर्नु होला ।’
२०७४ मा पहिलो पार्टी रहेको एमाले अहिले कांग्रेसभन्दा पछाडि पुगेको उल्लेख गर्दै नेपालले ओलीको कमजोरी औँल्याए । ओलीको कमजोरीले पार्टी कमजोर बनेको, तर उनले आफ्नो गल्ती लुकाउन अरुलाई दोषी देखाउने गरेको नेपालले बताए ।
यस्तै नेतृत्व नसुध्रिए नेकपा एमाले पतन भएर जाने समेत नेकपा एकीकृत समाजवादी पार्टीका अध्यक्ष नेपालले बताएका छन् ।