काठमाडौं, सेयरबजारमा आज एकै दिन चार अर्ब रुपैयाँको सेयर कारोबार भएको छ।
नेपाल स्टक एक्सचेन्जका अनुसार कुल १ सय ९६ कम्पनीको ९६ लाख ५७ हजार ६ सय ७७ कित्ता सेयर बिक्रीमा उक्त परिमाणको कारोबार भएको हो।
आज मंगलबार कुल ३८ हजार ६ सय ३४ पटक सेयर किनबेच भएको छ। कुल १२ समूहमध्ये जलविद्युत् र म्युचुअल फन्डको मात्रै कारोबार सूचक ओरालो लागेको छ। आज लगानीकर्ताको आकर्षण जीवन बीमामा एकोहोरिएको छ। नेप्सेका अनुसार जीवन बीमा सूचक ४७६.३६ अंकले उकालो लागेको छ।
आज नेपाल पुनर्बीमा कम्पनीको २८ करोड ५३ लाखको सर्वाधिक कारोबार भएको छ। यो कम्पनीलाई पछ्याएको नेपाल लाइफ इन्स्योरेन्स कम्पनीको २३ करोड ५८ लाखको कारोबार भएको छ। त्यस्तै हिमालयन डिस्टिलरी २० करोडको कारोबार गर्दै तेस्रो सर्वाधिक कारोबारकर्ता बनेको छ भने नेपाल टेलिकमको पनि २० करोडको सेयर किनबेच भएको छ।
कमाइमा भने साल्ट ट्रेडिङ कर्पोरेसनका लगानीकर्ता अगाडि छन्। कम्पनीको प्रतिकित्ता ४ सय ५० रुपैयाँ अर्थात् १० प्रतिशतले सेयर मूल्य बढेको छ। त्यस्तै, कर्पोरेट डेभलपमेन्ट बैंकको पनि १० प्रतिशतले सेयर मूल्य बढेको छ। यसबाहेक सानिमा जनरल इन्स्योरेन्स, नेपाल टेलिकमलगायत कम्पनीको सेयर पनि बढेको छ। आज जलविद्युतका लगानीकर्ताले भने गुमाएको नेप्सेले जनाएको छ।
