बुटवल दसैं बिदामा लुम्बिनी भ्रमणमा आउने आन्तरिक पर्यटकको संख्या ह्वात्तै बढेको छ।
यो वर्षको दसैंमा फूलपातीदेखि कोजाग्रत पूर्णिमासम्म ३९ हजार ६ सय २५ जना नेपाली पर्यटक लुम्बिनी आएको लुम्बिनी विकास कोषले जानकारी दिएको छ। यो अघिल्लो वर्ष दसैंंको समयभन्दा तीन गुणा बढी हो।गत वर्ष दसैंको फूलपातीदेखि कोजाग्रत पूर्णिमासम्मको अवधिमा १३ हजारले लुम्बिनी भ्रमण गरेको कोषको तथ्यांक छ। पछिल्लो समय नेपाली मा भ्रमण गर्ने संस्कृतिको विकास भएको छ। आइतबारबाट लुम्बिनीमा आन्तरिक पर्यटकको भीड लागेको लुम्बिनी विकास कोषका सूचना अधिकृत राजन बस्नेतले जानकारी दिए।
दसैंमा लुम्बिनीका होटल पनि भरिभराउ रहेको सिद्धार्थ होटल एसोसिएसन लुम्बिनी च्याप्टर अध्यक्ष मिथुनमान शाक्यले बताए। ‘विजयादशमी पछिका तीन दिन सबै होटल प्याक थियो। कतिपयलाई कोठा नपुगेर फर्काउनुपर्ने अवस्था थियो’, उनले भने, ‘होटलमा भएका पाहुनामध्ये ९० प्रतिशत नेपाली नै थिए।’ लुम्बिनीका होटलमा चार हजार पाहुना राख्नसक्ने क्षमता छ।
‘चुनावपछि राजनीतिक स्थिरताका कारण पनि आन्तरिक पर्यटक बढेको हुन्’, कोषका सूचना अधिकृत बस्नेतले भने ‘अघिल्लो वर्ष चुनावको वर्ष भएकाले आन्तरिक पर्यटकको संख्या कम थियो। यस वर्ष सुरुबाट नै लुम्बिनी आउने पर्यटक अहिलेसम्मकै उच्च दरमा बढेको बस्नेतले बताए।गत वर्ष काठमाडौं, पोखरालगायत ठाउँबाट आउन मुग्लिन–नारायणगढ खण्डको निर्माणाधीन सडक समस्या बनेको थियो। अहिले विस्तारित सडक सम्पन्न भइसकेको छ। शाक्यले भने, ‘यो वर्ष मुग्लिन–नारायणगढ सडकको सहजताले पनि आन्तरिक पर्यटकको आगमन बढेको हो।’