साउन ३०, काठमाडौं । एजेन्सी
भारतको बिहार राज्यस्थित मुजफ्फरपुर शेल्टर होममा बालिकाहरूमाथि बलात्कारको घटना सार्वजनिक भएपछि बिहारका अन्य यस्ता होमका बारेमा आश्चर्यजनक तथ्यहरू बाहिर आएका छन् ।
टाटा इन्स्टिच्युट अफ सोसल सायन्सेसको ताजा अडिट रिपोर्टमा उल्लेख भएअनुसार, त्यस्ता शेल्टर होममा बालिकाको यौन, मानसिक र शारीरिक शोषण गरिन्छ । त्यहाँ कामकाज पनि अत्यन्तै अव्यस्थित तरिकाले गरिन्छ ।
प्रतिवेदनअनुसार, १४ शेल्टर होममा यौन र शारीरिक यातना दिइन्छ । तीमध्ये कतिपय भवनका शौचालयमा ढोकै थिएनन् र स्टाफलाई त्यहाँ बस्ने बालिकाको बारेमा संवेदनशील कुराहरू थाहा थियो ।
ती शेल्टर होममा ल्याइएका बालिकामध्ये धेरैजसो बलात्कारपीडित थिए । अरूहरू यौनशोषण पीडित थिए । धेरै चाहिँ घरबाट भागेका थिए ।
शेल्टर होमको हालत जर्जर थियो । सरसफाइमा निकै समस्या थियो । उचित निकास व्यवस्था थिएन । मोतिहारी, मुंगेर, गया, अररिया र पटनाका शेल्टर होममा अनुचित व्यवहारको उल्लेख गरिएको छ ।
रिपोर्टमा लेखिएअनुसार, १४ शेल्टर होममा प्लास्टिक बोतलमा पिसाब भेटियो किनकि राति बच्चाहरूलाई ताल्चा लगाएर थुनिन्थ्यो ।
मोतिहारीमा बच्चीहरूलाई मोटो पाइपले पिटिएको पाइयो । मुंगेरमा बच्चाहरूलाई कारागारमा जस्तो गरी राखियो । गयामा बच्चीहरूलाई अश्लील कुरा लेखाइयो । अररियामा बच्चाहरूलाई प्रहरीले पिटे । पटनामा उनीहरूका लागि औषधि र कपडाको अभाव थियो ।
हाजीपुर शेल्ट होममा प्रहरीले अल्पवास गृहका प्रमुख कार्यकर्ता मनमोहन प्रसादलाई बच्चीहरूको यौन शोषण गरेको आरोपमा पक्राउ गरेको छ ।
