वैशाख २६, काठमाडौं ।
प्रधानमन्त्री केपी शर्मा ओलीले सोमबार गरेको ट्वीटबारे माओवादी केन्द्रका अध्यक्ष पुष्पकमल दाहाल प्रचण्डलाई स्पष्टिकरण दिएको बताइएको छ ।
आज विहान भएको एकान्तवार्तामा प्रचण्डले त्यसबारे प्रश्न गरेपछि ओलीले आफ्नो सचिवालयमा कार्यरतहरुले आफ्नो कुरै नबुझी त्यस्तो ट्वीट गरिदिएको जवाफ दिएका थिए ।
कुराकानीको सुरुमै प्रचण्डले ट्वीटमार्फत् ओलीले आफूलाई सत्तासमीकरण फेरबदलमा बानी परेको भनेर आरोपित गर्न खोजेको भन्दै आक्रोस पोखेको बताइएको छ ।
ओलीले राष्ट्रिय सुरक्षा परिषदको १७ औं बार्षिकोत्सबमा बोलेको कुरालाई आधार बनाएर ट्वीट गर्नुपर्नेमा संसदीय दलमा बोलेको कुरालाई आधार बनाएर ट्वीट गरिएको बताएका थिए ।
‘मेरो भनाई बिखण्डनवादीहरुप्रति लक्ष्यित थियो, तर सचिवालयका साथीहरुले त्यस्तो ट्वीट गरिदिनु भएछ’ ओलीको जवाफ थियो, ‘त्यो कुरा मैले पछिमात्र थाहा पाएँ।’
‘सचिवालयका साथीहरुको गल्तीले त्यस्तो हुन गएको’ भन्दै ओलीले क्षमायाचनाका साथ यो कुरालाई मनमा नराख्न आग्रह गरेको बताइएको छ ।
विहान साढे ९ बजेदेखि भएको एकान्त वार्तामा प्रचण्डले चुनाव सम्पन्न भएयता ओलीको तर्फबाट भएका गल्तीबारे गुनासो गरेको बताइएको छ ।