चैत २७, काठमाडौं ।
पोखरा बिरौटा चोकस्थित बिजुलीको पोलमा आगो लाग्यो । स्थानीय आत्तिए । आगो झन् दन्किँदै गयो । स्थानीयले प्रहरीदेखि बिजुली अफिससम्म फोन गरे । केही बेरमा साइरन बजाउँदै आगो निभाउन दमकल आइपुग्यो ।
दमकल चालकले पाइप निकाले तर पानी नै फालेन ।दमकल आगो ननिभाइ फर्कियो ।
पोखरा लेखनाथ महानगरपालिकाको दमकल आगो निभाउन रित्तै आएको भन्दै स्थानीयबासी आक्रोशित बने । उनीहरुले कैलाश बोरिङको पानी ट्यांकर ल्याएर आगो निभाए ।
दमकलको यस्तो लापरवाही ? ठूलै आगलागी भएको भए के हुन्थ्यो ? अहिले महानगरपालिकाप्रति पोखरेलीले यस्तै प्रश्न उठाइरहेका छन् ।
यतिबेला पोखरामा यो घटना भाइरल बनेको छ । आगो निभाउन बिग्रिएको दमकल पुगेपछि अतिसंवेदनशील घटनामा पनि चरम लापरबाही भएको भन्दै महानगरपालिकाको कडा आलोचना भइरहेको छ ।
स्थानीय तथा प्रत्यक्षदर्शीले रित्तो दमकल आगो निभाउन पुगेको भन्दै आलोचना गरिरहेका छन् भने महानगरपालिकाले रित्तो नभइ जाँदाजाँदै बिग्रिएको बताएको छ ।
सामाजिक सञ्चालमा पोखरा लेखनाथ महानगरपालिकाप्रति व्यंग्य तथा आलोचना गरेर लेखिरहेका छन् ।
अभयराज देवकोटाले पानीबिनै आगो निभाउने दमकल विश्वको कुन देशमा पाइन्छ ? प्रश्न राखेर उत्तरमा ‘पोखरा नेपाल’ लेखेका छन् ।
सुशीला क्षेत्रीले लेखेकी छन्, ‘हाम्रो पोखरामा अचम्मका घटना घट्छन् । जहाँ आगो लाग्छ तर दमकल पानी नलिइ घटनास्थल पुग्छ । कस्तो लाजमर्दो ।’
पोखरा र आसपासका नागरिकले यो घटनासँग जोडेर पोखरा महानगरपालिकालाई यसैगरी व्यंग्य गरिरहेका छन् ।
पोखरा महानगरपालिका मेयर मानबहादुर जिसीले दमकलमा पानी नभएको नभइ जाँदाजाँदै बिग्रिएको बताएका छन् । ‘रित्तो दमकल आगो निभाउन पुगेको होइन, जाँदाजाँदै प्राविधिक समस्या आएको हो,’ मेयर जिसीले भने, ‘दमकल प्रत्येक दिन चेक हुन्छ तर सोमबार जाँदाजाँदै बिगि्रयो ।’
पोखरा महानगरपालिकासँग दुई दमकल छन् । एक जना दमकल चालक बिदामा बसेको र एउटा बिग्रेका कारण सोमबारको घटना भएको मेयर जिसीले बताए ।
