आर्थिक वर्षको पहिलो महिनामै व्यापारघाटा २४% ले बढ्यो !

चालू आर्थिक वर्ष २०८३/८४ को पहिलो महिना साउनमै नेपालको व्यापार घाटा २४.८८ प्रतिशतले बढेर १ खर्ब ४८ अर्ब ७३ करोड ९५ लाख रुपैयाँ पुगेको छ। भन्सार विभागले सार्वजनिक गरेको पछिल्लो तथ्यांकअनुसार आयातमा भएको तीव्र वृद्धिका कारण निर्यात उत्साहजनक रूपमा बढे पनि व्यापार घाटा नियन्त्रण बाहिर गएको हो।

वस्तु आयातमा ३१ प्रतिशतको भारी वृद्धि

साउन महिनामा नेपालले १ खर्ब ८७ अर्ब ४४ करोड ३६ लाख रुपैयाँ बराबरको वस्तु आयात गरेको छ। अघिल्लो आर्थिक वर्ष २०८२/८३ को साउनमा १ खर्ब ४३ अर्ब ४० करोड ६९ लाख रुपैयाँको आयात भएकोमा यस वर्ष ३१.०४ प्रतिशतले वृद्धि भएको छ।

निर्यात ६१.७२ प्रतिशतले बढ्यो

आयातसँगै नेपालबाट हुने वस्तु निर्यातमा पनि उल्लेखनीय सुधार देखिएको छ। साउन महिनामा निर्यात ६१.७२ प्रतिशतले बढेर ३८ अर्ब ७० करोड ४४ लाख रुपैयाँ पुगेको छ। अघिल्लो वर्षको सोही अवधिमा २४ अर्ब ९३ करोड २४ लाख रुपैयाँ बराबरको वस्तु मात्र निर्यात भएको थियो।

वैदेशिक व्यापारको मुख्य सूचकहरू (साउन २०८३/८४)

कुल व्यापारमा निर्यातको हिस्सामा सुधार

समग्र वैदेशिक व्यापार बढेर २ खर्ब २६ अर्ब १४ करोड ७७ लाख रुपैयाँ पुगेको छ, जुन अघिल्लो वर्षको तुलनामा ३५.४४ प्रतिशत बढी हो। सकारात्मक पक्ष के छ भने, कुल वैदेशिक व्यापारमा नेपालको निर्यातको हिस्सामा सुधार आएको छ। अघिल्लो वर्ष साउनमा कुल व्यापारमा निर्यातको हिस्सा १४.३३ प्रतिशत रहेकोमा चालू आर्थिक वर्षको पहिलो महिनामा बढेर १७.११ प्रतिशत पुगेको छ। यद्यपि, आयातको आकार ठूलो भएकाले निर्यातको वृद्धिले समग्र व्यापार घाटा कम गर्न भने सकेको छैन।