प्रधानमन्त्री पुष्पकमल दाहाल ‘प्रचण्ड’ संसदमा नदेखिएकाले आउन छाडेको भन्दै नेकपा एमालेका सांसद रघुजी पन्तले बैठकमै प्रचण्ड हराएको सूचना सुनाएका छन् ।
आइतवार बसेको प्रतिनिधिसभा बैठकको शून्य समयमा एमाले सांसद पन्तले व्यंग्यात्मक शैलीमा प्रचण्ड हराएको सूचना सुनाउँदै फेला पार्नेले संसद् भवनमा बुझाइदिनु भनेर ठट्टा गरेका हुन् ।
सांसद पन्तले यसरी गरे व्यग्यः
नागरिकताको नामः श्री पुष्पकमल दाहाल ।
चलनचल्तीको नामः प्रचण्ड
स्थायी ठेगानाः फेरिइरहने
अस्थायी ठेगानाः कहिले बालुवाटार, केहिले खुमलटार
हुलियाः पहिले कोट पाइन्ट लगाउने, अहिले दौरा सुरुवाल र टोपी पनि लगाउने ।
उमेरः ६५ नाघेको ७० नपुगेको जस्तो देखिने ।
उहाँ केही दिन अगाडि प्रतिनिधि सभा बैठकका झुलुक्क देखिएर हाल संसदमा आउनै छाडेकाले उहाँलाई फेला पर्नु हुने व्यक्तिले संसद् भवनमा बुझाइदिनु होला ।
अन्तिमपटक देखिएको स्थान बालुवाटारको छेउछाउ ।
एमाले स्थायी कमिटी सदस्य समेत रहेका रघुजी पन्त संसदीय व्यवस्था बुझेका पाका सांसद मानिन्छन् ।