ओली नेतृत्वको वर्तमान सरकारको एक वर्ष पूरै असफल भएको कांग्रेसका सह–महामन्त्री डा प्रकाशशरण महतको दाबी

काठमाण्डौ, प्रमुख प्रतिपक्षी दल नेपाली कांग्रेसका सह–महामन्त्री एवम् पूर्व परराष्ट्रमन्त्री डा। प्रकाशशरण महतले प्रधानमन्त्री केपी शर्मा ओली नेतृत्वको वर्तमान सरकारको एक वर्ष पूरै असफल भएको दाबी गदै आरोप लगाउनु भएको छ । शुक्रबार राजधानीमा आयोजित एक साक्षात्कार कार्यक्रममा बोल्दै नेता महतले यो एक वर्षमा सरकारले जनतालाई पुरै निराश बनाएको आरोप लगाउनु भएको हो । उहाँले मुल्यवृद्धि आकाशिएको, व्यापार घाटा बढेको र लगानी घटेको बताउनु भयो । उहाँले भन्नु भयो , ‘अहिले ५० प्रतिशत लगानी घट्यो । कर बढिरहेको छ । बैंकको व्याजदर बढिरहेको छ ।’त्यस्तै उहाँले संस्थागत भ्रष्टाचार बढिरहेको पनि आरोप लगाउनु भयो । मेलम्ची खानेपानी आयोजना अनिश्चित् बनेको पनि उहाँको आरोप छ । महतले सरकारले सुशासन कायम गर्न नसकेको गम्भिर आरोप लगाउनु भयो । संघीय लोकतान्त्रिक गणतान्त्रिक व्यवस्थालाई कार्यान्वयन र संस्थागत गर्नतर्फ लाग्नुपर्ने उहाँको सुझाव छ । सरकारले कर्मचारीतन्त्रलाई पुरै पार्टीकरण गरेको पनि महतले आरोप लगाउनु भयो । परराष्ट्र नीतिमा पनि वर्तमान सरकार पुरै असफल भएको उहाँको आरोप छ । एशिया प्यासिफिक समिटमा पनि सरकार नै संरक्षक बनेको र प्रधानमन्त्री केपी शर्मा ओली तीन दिनसम्म होटेलमै बसेको भन्दै महतले आलोचना गर्नु भयो । महतले अहिले नेपालको आर्थिक नीति पनि पुरै असफल भएको दाबी गर्नु भयो ।