सन्धिखर्क, अर्घाखाँची जिल्लाको एक मात्र सरकारी अस्पतालमा क्षमताभन्दा बढी मात्रामा बिमारीको चाप बढेपछि ठूलो समस्या पैदा भएको छ ।
अस्पतालभित्रको सीमित साधन–स्रोत तथा विभिन्न जटिलताका कारण सेवाग्रही र अस्पतालकर्मी दुवैपक्ष असन्तुष्ट रहँदै आएका छन् ।
नेपाल सरकारबाट १५ बेडको स्वीकृति प्राप्त गरेको सन्धिखर्क अस्पतालमा आन्तरिक स्रोतलाई समेत हिसाब गर्दा जम्मा ३६ बेड रहेका छन् । दिनहुँ बिमारीको चाप बढ्दै गएपछि अस्पतालभित्रको करिडोर एवम् पेटीमा समेत बिमारी सुताएर अस्पतालले उपचार गराएको देख्न सकिन्छ ।
अस्पताल प्रमुख डा। जगन्नाथ तिवारीका अनुसार अस्पतालमा आएका बिमारीहरूलाई ‘ठाउँ छैन, फर्किनुस्’ भन्न नसकेपछि जसोतसो निर्वाह चलाउने ढंगले दिनहुँ ४५ बेडसम्म बिमारी भर्ना गरी उपचार गर्ने गरिएको छ । अस्पताल आउने बिरामीमध्ये आर्थिक रूपले सम्पन्नहरू अस्पतालको क्षमता र चिन्ता लाग्दो अवस्था देख्नेवित्तिकै बुटवल वा अन्यत्रकै अस्पताल जानु पर्ने अवस्था देखिएको छ ।
सन्धिखर्क अस्पतालमा यतिबेला भाइरल ज्वरोका बिमारी र गर्भवती महिलाको संख्या तुलनात्मक रुपमा बढि रहेको छ ।
