जेठ २०, काठमाडौं । एजेन्सी
भीडले मार्न खोजेको एक मुसलमानलाई बचाएर नायकका रूपमा सम्मानित एक भारतीय प्रहरीलाई ज्यानको धम्की आएको प्रहरीले बताएको छ ।
भारतको उत्तराखण्डमा गगनदीप सिंहले भीडबाट एक मुसलमानलाई बचाएको भिडियो सामाजिक सञ्जालमा सार्वजनिक भएपछि भाइरल बनेको थियो ।
उक्त मुसलमान युवक हिन्दू प्रेमिकाका साथ मन्दिर गएका थिए ।
भीडले उनलाई घे–यो अनि आक्रमण गर्न खोज्यो । उनीविरुद्ध लभ जिहाद गरेको आरोप लाग्यो ।
मुसलमान पुरुषले हिन्दू महिलालाई प्रेमजालमा फसाएर धर्मपरिवर्तन गर्नु लभ जिहाद हो भनी अतिवादी हिन्दूहरूले परिभाषित गर्ने गरेका छन् ।
भिडियो अनलाइनमा शेयर गरेपछि धेरैले सिंहलाई सबै भारतीयका लागि आदर्श भने अनि उनको कथा भारतको सबै मूलधारे सञ्चारमाध्यमले प्रकाशन गरे ।
उनीसँग काम गरिरहेका प्रहरी अधिकारीले गगनदीपलाई ज्यान मार्ने धम्की आएको बताए । अहिले उनलाई छुट्टीमा पठाइएको छ ।
भारतीय जनता पार्टीका केही नेताले भीडको क्रियाकलापलाई जायज ठह–याएका छन् ।
