माघ २३, काठमाडौं ।
प्रदेशसभाको बैठक प्रारम्भ भए लगतै प्रदेश ३ को रानधानी हेटौंडामा मुख्यमन्त्रीको कार्यालयसहित पाँच वटा मन्त्रालय खुले ।
मन्त्रालयको नाम भएको बोर्ड पनि झुण्ड्याइएको छ ।
तर, अझैसम्म मन्त्रालयमा कर्मचारी आएका छैनन् ।
सामान्य प्रशासन मन्त्रालयले सचिव उपसचिवसहित २ सय ७ जना कर्मचारी खटाएको बताएको छ । तर, दुइ सचिव र पाँच उपसचिव बाहेक अरु कर्मचारी अझैसम्म हाजिर हुन आएका छैनन् ।
कर्मचारी नआउँदा मन्त्रालय कर्मचारीविहीन जस्तै भएको छ ।
मुख्यमन्त्रीको कार्यालयसहित पाँच मन्त्रालय स्थापना भइसक्दा पनि कर्मचारी नआएको प्रदेश ३ मन्त्रिपरिषदको कार्यालयका सचिव रमेशप्रसाद सिवाकोटीले बताए ।
प्रदेशमा रहने ७ मध्ये मुख्यमन्त्री तथा मन्त्रीपरिषदको कार्यालय्, आन्तरिक मामिला तथा कानून, सामाजिक विकास, उद्योग पर्यटन तथा वातावरण र भूमि व्यवस्था कृषि तथा सहकारी मन्त्रालय स्थापना भएको छ ।
मुख्यमन्त्रीको कार्यालयले आन्तरिक तयारी थालिसकेको छ भने आर्थिक मामिला र भौतिक पूर्वाधार विकास मन्त्रालयले भवन व्यवस्थापनको काम गरिरहेको छ ।
- मुख्यमन्त्रीको कार्यालयमा २१,
- आन्तरिक मामिलामा ४१,
- आर्थिक मामिलामा १८,
- भौतिक पुर्वाधारमा २४,
- सामाजिक विकासमा ३०,
- उद्योगमा २९
- र भूमि व्यवस्था मन्त्रालयमा २९ जना कर्मचारी खटाइएको छ ।
