मंसिर १२, काठमाडौं । भारतका प्रधानमन्त्री नरेन्द्र मोदीले आफ्नो गृह राज्य गुजरातबाट औपचारिक रुपमा आफ्नो चुनावी अभियान शुरु गरेका छन् ।
प्रमुख प्रतिपक्षी पार्टी भारतीय काँग्रेसका विरुद्धमा केन्द्रित गरेर उनले सोमबार चुनावको प्रचारप्रसार अभियान शुरु गरेको भारतीय सञ्चारमाध्यमले जनाएका छन् । गुजरात राज्यमा पनि भारतको केन्द्रीय सत्तारुढ दल भारतीय जनता पार्टी (भाजपा) कै सरकार रहेको छ ।गुजरात राज्यमा आउँदो डिसेम्बर ९ तारिखका दिन मतदान हुन लागेको छ । निर्वाचनको अन्तिम नतिजा भने आउँदो डिसेम्बर १८ मा घोषणा गर्ने कार्यतालिका रहेको छ । पश्चिमी भारतीय राज्यको कुट्च जिल्लामा आयोजित सभालाई सम्बोधन गर्दै प्रधानमन्त्री मोदीले गुजरातमा विकास र राजवंशीयका बीच निर्वाचन हुन लागेको बताए ।
आफ्नो पार्टीका हजारौँ समर्थकको सहभागीता रहेको कार्यक्रममा उहाँले आफ्नो मन्तव्य भारतीय काँग्रेस पार्टीका वरिष्ठ नेता राहुल गान्धीप्रति लक्षित गरेको थियो । गुजरातमा वरिष्ठ नेता गान्धीले पनि आफ्नो पार्टीको जित सुनिश्चित भएको भन्दै चुनावी अभियान चलाइरहनु भएको छ । गुजरातमा प्रधानमन्त्री मोदी सन् २०११ देखि १०१४ सम्म मुख्य मन्त्री रहेका थिए ।
