![](https://aayokhabar.com/wp-content/uploads/2017/10/nepali-congress-flag.jpg)
असोज २१, नुवाकोट। नेपाली कांग्रेस नुवाकोटले आसन्न प्रतिनिधिसभा र प्रदेशसभा सदस्य निर्वाचनका लागि सम्भावित १४३ जना उम्मेदवारको नामावली केन्द्रलाई बुझाएको छ ।
कांग्रेस नुवाकोटका सभापति जगदीश्वरनरसिंह केसीले शनिबार पार्टी केन्द्रीय सभापति शेरबहादुर देउवालाई ‘जम्बो’ उम्मेदवारका नाम समावेश गरिएको सूची बुझाएका हुन् । नुवाकोटमा कायम प्रतिनिधिसभा सदस्यका लागि दुई र प्रदेशसभा सदस्यका लागि चार निर्वाचन क्षेत्रबाट प्रत्यक्ष र समानुपातिकतर्फ आकांक्षीहरु धेरै भएपछि १४३ जनाको नाम बुझाएर अन्तिम निर्णय गर्ने अधिकार केन्द्रलाई दिएको छ ।
कांग्रेस नुवाकोटले प्रतिनिधिसभा क्षेत्र नम्बर–१ बाट प्रत्यक्षतर्फ अर्जुननरसिंह केसी, डा। रामशरण महत र सरिता लामाको नाम प्रस्ताव गरेको छ । प्रतिनिधिसभा क्षेत्र नम्बर–१ बाट समानुपातिकतर्फ १३ जनाको नाम समावेश गरिएको सभापति केसीले जानकारी दिए । प्रतिनिधिसभा क्षेत्र नम्बर–१ को प्रदेशसभा क्षेत्र नम्बर–१ बाट प्रत्यक्षतर्फ महेन्द्र थिङ, गोविन्दप्रसाद थपलिया, विषम रिमाल, दिनेश खनाल, निलम उप्रेती र विनोद शाह रहेका छन् । प्रदेशसभा क्षेत्र नम्बर–१ बाट समानुपातिकतर्फ २४ जनाको नाम समावेश छ ।
प्रदेशसभा क्षेत्र नम्बर–२ बाट प्रत्यक्षतर्फ यमबहादुर थापा, भाग्यश्री लामा, रमेशकुमार महत, अर्जुनप्रसाद न्यौपाने, धनकुमारी थापा र कृष्णबहादुर लामाको नाम समावेश छ । प्रदेशसभा क्षेत्र नम्बर–२ बाट समानुपातिकतर्फ २२ जनाको नाम प्रस्ताव गरी पार्टी केन्द्रीय सभापति देउवालाई बुझाएको कांग्रेस नुवाकोट सभापति केसीले जानकारी दिए । यस्तै, प्रतिनिधिसभा क्षेत्र नम्बर–२ बाट प्रतिनिसधासभा प्रत्यक्षतर्फ जिल्ला सभापति केसी, बहादुरसिंह लामा तामाङ, डा। प्रकाशशरण महत र हीरा पाण्डेलाई प्रस्ताव गरिएको छ ।
प्रतिनिधिसभा क्षेत्र नम्बर–२ को समानुपातिकतर्फ ९ जनाको नाम प्रस्ताव गरी केन्द्रमा बुझाइएको छ । प्रतिनिधिसभा क्षेत्र नम्बर–२ को प्रदेशसभा क्षेत्र नम्बर–१ बाट प्रत्यक्षतर्फ पार्टी जिल्ला सचिव सुरेन्द्रराज अधिकारी, शिवप्रसाद दाहाल, बैकुण्ठबहादुर पाण्डे, भूपेन्द्र बानियाँ, विष्णुराज नेपाल, दीपक लामा, जयराम दाहाल, मोहनबहादुर खड्का, सानुकान्छा नेपाल र उपेन्द्र बुढाथोकीलाई प्रस्ताव गरिएको छ ।प्रदेशसभा क्षेत्र नम्बर–१ बाट समानुपातिकतर्फ १९ जनाको नाम प्रस्ताव गरिएको छ ।
प्रदेशसभा क्षेत्र नम्बर–२ बाट प्रत्यक्षतर्फ जगतबहादुर तामाङ, भरत खड्का, शिव अधिकारी, गणेश वाइबा, सरिता अधिकारी र च्याउकीमाया तामाङको नाम प्रस्ताव गरिएको छ । प्रदेशसभा निर्वाचन क्षेत्र नम्बर–२ बाट समानुपातिकतर्फ २१ जनाको नाम सिफारिस गरिएको छ । केन्द्रीय सभापतिलाई बुझाइएको नामावलीमा क्षेत्रीय कार्यसमितिबाट प्रस्ताव भएको नाम पार्टीको केन्द्रीय कार्यसमतिको निर्देशनबमोजिम नभएको, पार्टीको १३औं महाधिवेशनमार्फत् निर्वाचित जिल्ला सभापति, सचिव, जिल्लाबाट केन्द्रीय तहमा प्रतिनिधित्व गर्ने नाम समावेश नभएकाले जिल्ला कार्यसमितिले बाध्य भएर परिवर्तन तथा परिमार्जन गर्नुपरेको जनाएको छ । रासस