काठमाडौँ , यस वर्षको हृदयचन्द्र स्मृति सम्मान वरिष्ठ समालोचक डाक्टर ऋषिराज बराल र गोपालप्रसाद रिमाल पुरस्कार साहित्यकार शार्दूल भट्टराईलाई प्रदान गरिएको छ।
शनिबार साहित्य सदनले राजधानीमा गरेको एक कार्यक्रममा वरिष्ठ साहित्यकार तथा समालोचक प्राध्यापक डाक्टर राजेन्द्र सुवेदीले बराल र भट्टराईलाई सम्मान गरेका हुन् ।
हृदयचन्द्र स्मृति सम्मानको राशि २५ हजार तथा गोपालप्रसाद रिमाल पुरस्कारको राशी २० हजार रहेको छ ।
कार्यक्रममा आख्यानकार नारायण ढकालले पुरस्कृत स्रष्टाद्वयको साहित्यिक योगदानका बारे समीक्षा गरेका थिए ।
सोही अवसरमा अतिथिगणबाट साहित्यकार बसन्त रिजालको पहिलो कविता संग्रह “ब्युँझिएपछि” को विमोचन गरिएको थियो ।
साहित्यकार डाक्टर विदुर चालिसेले विमोचित कृतिको समीक्षा गर्दै रिजालका कविता प्रगतिशील चेतले भरिपूर्ण रहेको टिप्पणी गरे ।
कार्यक्रममा साहित्य सदनका उपाध्यक्ष प्राध्यापक डाक्टर हेमनाथ पौडेल, साहित्यकारहरु सीता शर्मा, मित्रलाल पंज्ञानी लगायतले नेपाली साहित्यमा हृदयचन्द्र सिंह प्रधान र गोपालप्रसाद रिमालको विशिष्ट योगदानको चर्चा गरेका थिए । साथै स्रष्टाहरुले प्रधान र रिमालको स्मरणमा कविताहरु वाचन गरेका थिए ।
