काठमाडौँ , नेपाली कांग्रेसका पूर्वकोषाध्यक्ष एवं पूर्वमन्त्री रामकृष्ण ताम्राकारको पार्थिव शरीरमा सभापति शेरबहादुर देउवाले पार्टीको झण्डा ओढाएर सम्मानसहित अन्तिम श्रद्धाञ्जलि दिनु भयो । स्व ताम्राकारको शवलाई अन्तिम श्रद्धाञ्जलिका लागि आज बिहान १०ः३० बजेदेखि दिउँसो १ बजेसम्म पार्टीको केन्द्रीय कार्यालय सानेपामा राखिएको थियो ।
सभापति देउवाले पार्टीको चारतारे झण्डा ओढाउनु भएको थियो । सो अवसरमा वरिष्ठ नेता रामचन्द्र पौडेल, उपसभापतिद्वय विमलेन्द्र निधि र विजयकुमार गच्छदार, महामन्त्रीद्वय डा। शशांक कोइराला र पूर्णबहादुर खड्का, कोषाध्यक्ष सीतादेवी यादव, सहमहामन्त्री डा प्रकाशशरण महतलगायत केन्द्रीय सदस्यहरुको उपस्थित रहेको थियो ।
पार्टीका धेरै केन्द्रीय सदस्य एवं नेता आजदेखि सुरु हुने घोषणा गरिएको जनजागरण अभियानका लागि जिल्ला जिल्लामा पुगेका थिए । लोकतन्त्र दिवसको अवसर पारेर आजदेखि कांग्रेसले ७७ वटै जिल्लामा जनजागरण अभियान सुरु गर्ने तयारी गरेको थियो । नेता ताम्राकारको निधन भएकाले कार्यक्रम वैशाख २५ गतेदेखि सुरु हुने नयाँ कार्यतालिका बनाइएको पार्टी प्रवक्ता विश्वप्रकाश शर्माले जानकारी दिनु भयो ।
नेता ताम्राकारको उपचारका क्रममा मङ्गलबार दिउँसो ३ः४५ बजे ललितपुरस्थित अल्का अस्पतालमा निधन भएको थियो ।
उहाँले पार्टीका श्रद्धेय नेता बिपी कोइराला, गणेशमान सिंह, सुवर्ण शम्शेर, कृष्णप्रसाद भट्टराई, गिरिजाप्रसाद कोइराला र सुशील कोइरालाको सानिध्यमा रही प्रजातान्त्रिक आन्दोलनमा जीवनपर्यन्त क्रियाशील रहेको कांग्रेसले जनाएको छ ।
उहाँले पार्टीको ११औँ महाधिवेशनपछि कोषाध्यक्षको भूमिका निर्वाह गर्नु भएको थियो । भैरहवा सिद्धार्थनगर निवासी ताम्राकार काठमाडौँमा बस्दै आउनु भएको थियो । मङ्गलबार बेलुकी बसेको पार्टी केन्द्रीय समितिको बैठकले दिवंगत नेता ताम्राकारप्रति उच्च सम्मान प्रकट गर्दै वैशाख ११, १२ र १३ गते तीन दिनसम्म पार्टीको केन्द्रीय कार्यालय र मातहतका सबै कार्यालयमा झण्डा आधा झुकाउने निर्णय गरेको छ ।
तीन दिनसम्म शोक श्रद्धाञ्जलिका कार्यक्रमबाहेक पार्टीका अरु सबै कार्यक्रम स्थगन गर्ने निर्णय पनि कांग्रेसले गरेको छ । त्यस्तै आज केन्द्र तथा मातहतका सबै कार्यालय बन्द गर्ने, स्वर्गारोहणको १३ औँ दिनसम्म केन्द्र र जिल्ला कार्यालयमा शोक पुस्तिका राख्ने, स्वर्गारोहणको १३औँ दिनमा केन्द्र र सबै जिल्लामा शोकसभाको आयोजना गर्ने निर्णय गरेको छ ।
कांग्रेसको केन्द्रीय कार्यालय, रुपन्देही जिल्ला कार्यालयलगायत पार्टीको भौतिक संरचना निर्माणमा उहाँको नेतृत्वदायी भूमिका थियो ।
