चैत २२, काठमाडौं ।
महानगरीय अपराध अनुसन्धान महाशाखाका प्रमुख प्रहरी वरिष्ठ उपरीक्षक (एसएसपी) दिवेश लोहोनीलाई फिर्ता बोलाउन गृह मन्त्रालयले प्रहरी प्रधान कार्यालयलाई पत्र काटेको छ ।
मन्त्रालय स्रोतका अनुसार तस्करीको साढे ३३ केजी सुन गायब भएपछि भरिया सनम शाक्यको हत्या भएको घटनामा प्रहरीको भूमिका शंकास्पद देखिएपछि उनलाई जिम्मेवारीबाट फिर्ता बोलाउन सह–सचिव ईश्वर पौडेल नेतृत्वको छानबिन समितिले बिहीबार प्रहरी प्रधान कार्यालयलाई पत्राचार गरेको हो ।
लोहोनीको ठाउँमा नयाँ एसएसपी पठाउने तयारी भइरहेको समेत स्रोतको भनाइ छ ।
यसअघि गत १९ फागुनमा गाडीको ढिकीमा मोरङ, उर्लाबारी–७ का ३३ वर्षीय शाक्यको शव भेटिएको थियो ।
र, घटनाको विषयमा प्रहरीले गम्भीरतापूर्वक अनुसन्धान नगरेको भन्दै उजुरी परेपछि प्रहरी मुख्यायल र गृहमन्त्रालयले छुट्टाछुट्टै अनुसन्धान समिति बनाएर छानबिन सुरु गरेको थियो ।
प्रहरीकै मिलेमतोमा सुन गायब भएको हुन सक्ने आशंकामा अनुसन्धान थालिएको थियो ।
महानगरीय अपराध अनुसन्धान महाशाखाको टोलीले घटनामा संलग्न भएको भन्दै तीन जनालाई पक्राउ गरेको थियो । तर, सुनका मालिक भने अझै फरार छन् ।
