काठमाडौं । उदयपुरको त्रियुगा नगरपालिका वडा नं १४ साउनेका तीन दिनदेखि सुनकोसी नदीमा हराई रहेका तीन बालबालिका अझै भेटिएका छैनन ।
उनीहरूको खोजी कार्यको लागि परिचालन भएको सशस्त्र प्रहरीको गोताखोर टोली पनि फिर्ता भएको छ ।सोमबार दिन भर पानी मुनी खोजे पनि बालबालिकाको अवस्था पत्ता लगाउन नसकेपछि सशस्त्र प्रहरी बलको टोली फिर्ता भएको हो ।
आइतबार होली खेलेर नुहाउने क्रममा सुनकोसी नदिमा पौडी खेल्दा त्रियुगा नगरपालिका १४ साउनेका १२ वर्षीय रेखा मगर, ९ वर्षीय रिदम मगर र १२ वर्षीय लोक बहादुर मगर बेपत्ता भएका थिए ।
बालबालिकाको खोजतलास गर्न सशस्त्र प्रहरी बल नम्बर १ बाराह बाहिनी मुख्यालय पकली सुनसरीबाट प्रहरी निरीक्षक उमेश काफ्लेको नेतृत्वमा ११ जना सशस्त्र प्रहरीको गोताखोर र नेपाल प्रहरीको ६ जनाको टोली खटिएकोमा करिव २ किलोमिटरसम्म पानी जमेको सबै स्थानमा खोजी गर्दा समेत नभेटाएपछि खोजतलास टोली फर्किएको उदयपुरका प्रमुख जिल्ला अधिकारी हरिप्रसाद घिमिरेले जानकारी दिए ।
गोताखोरको टोलीले समेत नभेट्टाएपछि बालबालिकालाई नदिले बगाएर अन्य स्थानमा लगेको हुनसक्ने अनुमानसहित थप प्रहरी टोली परिचालन किनारा केन्द्रित खोजी कार्य सुरु गरिएको समेत घिमिरेले जानकारी दिएका छन्।
