माघ ९, काठमाडौं ।
भारतीय पक्षले नेपाली अदुवा निकासीमा अवरोध गरेको छ । जसका कारण काँकडभिट्टा भन्सारमा पुगिसकेको दश हजार टन अदुवा फर्काइएको छ ।
नेपाली अदुवा गुणस्तरहीन भएको र चिनियाँ अदुवा मिसाइएको भारतीय पक्षको दावी छ । यहि दावी गर्दै भारतीय पक्षले पूर्र्वी पहाडी क्षेत्रबाट भारत निकासीका लागि अदुवा बोकेर काँकडभिट्टा नाका पुगिसकेका ४० वटा ट्रक दुई हप्तादेखि रोकेर राखिएको थियो ।
अदुवा निकासीका लागि एक साता लामो प्रयास असफल भएपछि कोही व्यापारीले नजिकैको गोदाममा राखेका छन् । कोहीले पहाड नै फर्काएका छन् । कोहीले भने गाडीमै अदुवा राखेका छन् ।
अचानक निकासी बन्द हुँदा व्यापारीहरुको विचल्ली भएको छ ।
दुई हप्तासम्म अदुवा गाडीमै राखेकाले गाडी भाडाबाट समेत थप नोक्सानी व्यहोर्नु परेको व्यापारीहरु बताउँछन् ।
माथिको आदेश भन्दै भारतीय भन्सारले अचानक अदुवा निकासीमा रोक लगाएको व्यापारीहरु बताउँछन् । माथिबाट के पत्र आएको हो भनेर सोध्दा खुलाउन चाहँदैनन् ।
भारतीय वाणिज्य मन्त्रालयबाट स्वीकृती लिएर मात्र निकासी गर्न दिने भारतीय भन्सार अधिकारीहरुले बताएको अदुवा उत्पादक तथा व्यवसायी संघका केन्द्रीय अध्यक्ष नरेन्द्र खड्काले बताए ।
व्यापारीहरुले कूटनीतिक पहल गरेर लोड भएको अदुवा निकासीको व्यवस्था मिलाइदिन सरकारसँग आग्रह गर्द आएका छन् ।
