असोज २६, काठमाडौं । इरानमा आयोजना हुने एएफसी फुटसल च्याम्पियनसिप छनोटका लागि नेपाली राष्ट्रिय फुटसल टोलि बिहीबार राति इरान प्रस्थान गर्दैछ । पहिलो अन्तर्राष्ट्रिय फुटसल प्रतियोगिताको रुपमा रहेको एएफसी फुटसल च्याम्पियनसिप छनोट खेल्न नेपाली टोली इरान जाने भएको हो ।
च्याम्पियनसिप छनोटको लागि १४ सदस्यीय खेलाडी र ९ अफिसियल गरी २३ सदस्यीय नेपाली टोली इरान जानेछ । छनोट खेल्न लागेको नेपाली टोलीलाई बिहिबार नै अखिल नेपाल फुटसल संघ एन्फाले विदाइ गरेको थियो । एन्फा अध्यक्ष नरेन्द्र श्रेष्ठ लगायतले नेपाली टोलीलाई विदाई गरेका थिए ।
इरानमा शुक्रबारबाट सुरु हुने छनोटमा नेपाली टोलीले दोस्रो चरण पुग्ने लक्ष्य लिएको छ । नेपाली टोलीको विदाईपछि बोल्दै राष्ट्रिय टोलीका मुख्य प्रशिक्षक राकेश श्रेष्ठले छोटो तयारी गरेपनि टिम राम्रो भएकोले दोस्रो चरण पुग्ने योजना रहेको बताए । उनले भने, “पहिलोपटक नेपालले फुटसल खेल्न लागेको छ, यो मेरो लागि पनि ठूलो चुनौती हो । इरानमा एसियाका उत्कृष्ट टोलीहरु रहेका छन् तर खेलाडीले राम्रो तयारी गरेका छन् । खेलाडीमा राम्रो खेल्ने भावना छ, दोस्रो चरणमा पुग्ने लक्ष्यसहित तयारी गरेका छौं ।”
छनोटको लागि एन्फाको फुटसल कमिटीले गएको भदौमा रेडबुल एन्फा राष्ट्रिय लिग फुटसल आयोजना गरेको थियो । त्यसैको आधारमा फुटसल कमिटीले पहिलो चरणमा २७ खेलाडी छनोट गरी अन्तिम नेपाली टोलीको घोषणा गरेको थियो । प्रशिक्षकहरु राकेश श्रेष्ठ, राजेश शाही र बिष्णु गुरुङको छनोट समितिले नेपाली टोलीको घोषणा गरेको हो । नेपालको यो पहिलो अधिकारिक फुटसल टोली समेत हो ।
साउथ एसिया जोनको छनोट अन्तर्गत समूह ए को नेपालले आगामी आइतबार उज्वेकिस्तानसँग खेल्दै प्रतियोगिताको सुरुवात गर्नेछ । त्यसैगरी सोमबार किर्गिस्तान र मंगलबार तुर्कमिनिस्तानसँग प्रतिस्पर्धा गर्नेछ । समूह बी मा आयोजक इरान, ताजिकिस्तान र अफगानिस्तान रहेका छन् । समूहका शीर्ष २ टिम सन् २०१८ मा चाइनिज ताइपेहमा हुने एएफसी फुटसल च्याम्पियनसिपमा छनोट हुनेछन् । च्याम्पियनसिपमा १६ टिमबीच प्रतिस्पर्धा हुनेछ ।
पहिलो पटक राष्ट्रिय फुटसल टोली निर्माण भएको भएपनि नेपाली टोली कमजोर नरहेको र च्याम्पियनसिपबाट धेरै कुरा सिक्न सक्ने प्रशिक्षक श्रेष्ठले बताए । “हामीले १–२ महिना निकै मेहेनत गरेका छौं टिमको रिजल्ट पनि राम्रो आउने छ भन्ने लागेको छ । पहिलोपटक टिम बनेपनि खेलाडीहरुको स्किल र साझेदारी राम्रो छ,” श्रेष्ठले भने, “हामीले त्यहाँ राम्रो खेल्नुका साथै धेरै कुराहरु सिक्ने छौ ।”
यस्तै नेपाली टोलीका कप्तान सुरज राउतले सोचेजस्तो तयारी नभएपनि आफ्नो टोलीले उत्कृष्ट फुटसल खेल्ने बताए । कप्तान राउतले भने, “इरानमा उत्कृष्ट टोलीहरु रहेका छन् । उनीहरु धेरै माथि छन् । हामीले सोचेको जस्तो तयारी गर्न सकेनौ तर हामीले छोटो समयमा धेरै सिकेका छौ । त्यहाँ राम्रो फुटसल खेल्दै उनीहरुको लेभलमा खेल खेल्ने रहेको छ ।” यस्तै कप्तान राउतले नेपालको पहिलो राष्ट्रिय फुटसल टोलीको कप्तानी पाउँदा आफूलाई धेरै जिम्मेवारी पाएको र त्यस जिम्मेवारीलाई पुरा गर्ने बताए ।
नेपाली टिम
गोलकिपर – अनिस श्रेष्ठ, सुमित कुमार आले
डिफेन्डर – राज शाही, सौरभ मगर, अमित तामाङ
मिडफिल्डर – नवीन लामा (उपकप्तान) , अरुज सिंह, विनोद गुरुङ, मणीकुमार लामा, अभय राना
फरवार्ड – सुरज राउत (कप्तान),सुसन श्रेष्ठ, संजोग महर्जन, निर्मल गुरुङ
मुख्य प्रशिक्षक – राकेश श्रेष्ठ
सहायक प्रशिक्षक – राजेश खड्की
