वैशाख २३, काठमाडौं ।
पाँचथरको कुम्मायक गाउँपालिकाको केन्द्र यासोकमा जारी अन्तर्राष्ट्रिय आमन्त्रण दोस्रो कुम्मायक–कुसायक गोल्डकप फुटवल प्रतियोगिताको शनिबारको खेलमा सुन्धारा क्लब, काठमाडौँ विजयी बन्दै सेमिफाइनलमा प्रवेश गरेको छ ।
शनिबार भएको क्वार्टरफाइनल खेलमा कर्णसिंङ सोनाम मेमोरियल फुटबल क्लब ताप्लेजुङलाई ४–२ गोल अन्तरले पराजित गर्दै सुन्धारा क्लब, काठमाडौँ सेमिफाइनलमा प्रवेश गरेको हो ।
काठमाडौँको जितमा विशाल राईले खेलको १० औँ मिनेटमा, खामिर गिल्सन कन्दङवाले २६ औँ मिनेटमा, कर्ण लिम्बूले ३३ औँ मिनेटमा र ६४ औँ मिनेटमा पुजन उपरकोटीले गोल गरेका थिए ।
ताप्लेजुङका लागि ३७ औँ मिनेटमा दीपक लिम्बू र ७६ औँ मिनेटमा क्रिस राईले गोल गरेका थिए । खेलको म्यान अफ द म्याच सुन्धारा क्लब काठमाडौँका निशान्त खड्का घोषित हुदैँ रु पाँच हजार प्राप्त गरे ।
जिल्लाकै सर्वाधिक पुरस्कार राशि रहेको प्रतियोगिताका विजेताले ट्रफीसहित रु तीन लाख ११ हजार १११ प्राप्त गर्नेछ भने उपविजेताले रु एक लाख ५१ हजार १११ प्राप्त गर्नेछ ।
