निजि विध्यालयमा शुल्क बृद्धि नगर्न : शिक्षा मन्त्रीको निर्देशन

१४ बैशाख २०७५, शुक्रबार ११:०१

वैशाख १४, काठमाडौं

शिक्षा, विज्ञान तथा प्रविधि मन्त्री गिरिराजमणि पोखरेलले सरकारले निर्धारण गरेको भन्दा बढी शुल्क नलिन निजी विध्यालयलाई निर्देशन दिएका छन् ।

भक्तपुरमा सञ्चारकर्मीसँग कुरा गर्दै उनले विध्यालयले मनोमानी रुपमा शुल्क असुलेको गुनासो बढेको बताउँदै बढी शुल्क नअसुल्न विध्यालयलाई निर्देशन दिएका हुन् । विध्यालय शुल्क तत्काल अनुगमन गरेर शुल्क नियन्त्रण गर्न स्थानीय तहलाई उनले आग्रह गरे ।

मन्त्रालयले स्थानीय तहलाई तत्काल शुल्क वृद्धि नियन्त्रण गर्न आग्रह गरिसकेको बताउँदै मन्त्री पोखरेलले भने, “मनोमानी ढंगले विध्यालयले शुल्क वृद्धि गरेको गुनासो आएको छ, यसलाई तत्काल नियन्त्रण गर्नु जरुरी छ, स्थानीय तहलाई तत्काल शुल्क अनुगमन गरेर शुल्क वृद्धि नियन्त्रण गर्न म आग्रह गर्दछु ।” उनले शुल्क वृद्धि नियन्त्रण नगर्ने विध्यालयलाई कारबाही गर्न सरकार कटिबद्ध रहेको बताए । सञ्चारकर्मीसँग कुरा गर्दै उनले विद्यार्थीलाई लामबद्ध नराख्न विध्यालयलाई निर्देशन दिए ।