मंसिरको निर्वाचनलगत्तै एमाले–माओवादी एकता हुने

१७, काठमाडौँ। नेकपा (एमाले) का महासचिव ईश्वर पोखरेलले एमाले र नेकपा (माओवादी केन्द्र) बीच निर्वाचन सकिएलगत्तै एकता हुने बताएका छन्।

एमाले टोखा – २ र ३ ले आज आयोजना गरेको कार्यकर्ता भेलामा उहाँले दुई पार्टी एक गर्न नै वाम गठबन्धन गरिएको जानकारी दिए। काठमाडौँ क्षेत्र नं ५ बाट एमालेतर्फबाट प्रतिनिधिसभाका लागि उम्मेदवारसमेत रहेका पोखरेलले उम्मेदवारी दर्ताका क्रममा देखिएको उत्साहले वाम गठबन्धनले दुई तिहाइ ल्याउने जिकिरसमेत गरे। “हामी प्रतिनिधि र प्रदेशसभाको निर्वाचनमा दुई तिहाइ ल्याएर सरकार बनाउँछौँ”, उनले भने, “अनि त्यो स्थिर सरकार भएपछि देशको कायापलट गर्छौं ।” उनले टिकट वितरणमा केही असन्तुष्टि देखिए पनि मिलाएर लैजाने बताए।

“वाम गठबन्धन गर्दा सबैको चित्त बुझाउन सकिएन”, उनले थपे, “देश बनाउनका लागि गठबन्धन गरेको हुनाले सानातिना कुरामा चित्त दुखाउन हुँदैन ।” कार्यक्रममा सोही निर्वाचन क्षेत्रका प्रदेशसभा ‘ख’ का उम्मेदवार दीपक निरौलाले वाम गठबन्धनले देशव्यापी रुपमा सजिलै जित्ने जिकिर गरे। रासस


प्रकाशित | २०७४ कार्तिक १७ प्रकाशित १३:२६

जवाफ लेख्नुहोस्

तपाईंको ईमेल ठेगाना प्रकाशित हुने छैन । आवश्यक ठाउँमा * चिन्ह लगाइएको छ