जेठ १६, काठमााडौं ।
बुटवलमा पहिलोपटक राष्ट्रिय मेयर कप खुल्ला टेबल टेनिस प्रतियोगिता हुने भएको छ ।
रुपन्देही जिल्ला टेबल टेनिस संघको आयोजनामा यही जेठ १८ र १९ गते हुने प्रतियोगितामा देशभरबाट जुनसुकै उमेर समूहका पुरुष र महिला खेलाडी सहभागी हुन सक्ने छन् ।
आयोजक संघका जिल्ला अध्यक्ष कृष्णकुमार श्रेष्ठका अनुसार प्रतियोगितामा विभागीय टिम त्रिभुवन आर्मी क्लबका खेलाडीसहित पुरुषतर्फ ५० जना र महिलातर्फ ३५ जनाले प्रतिस्पर्धा गर्दैर्छन् ।
प्रतियोगितामा पुरुष एकल र महिला एकल गरी दुई विधामा स्कुल-कलेजका खेलाडीदेखि भेट्रान्स उमेर समूहका खेलाडीले प्रतिस्पर्धा गर्ने छन् ।
प्रतियोगिताको पुरुषतर्फको विजेताले ५० हजार उपविजेताले २५ हजार र महिलातर्फ विजेताले ३० हजार उपविजेताले १५ हजार नगद पुरस्कार प्राप्त गर्ने प्रतियोगिताका संयोजक महेश खनालले जानकारी दिए ।
टेबल टेनिस प्रतियोगितामा मोफसलमा यो पुरस्कार राशी अहिलेसम्मकै सर्वाधिक भएको रुपन्देहीका पुराना टेबलटेनिस खेलाडी अर्जुनमान सैंजूले बताए ।
बुटवल देवीनगरस्थित नव दिलिप कभर्ड हलमा संचालन हुने प्रतियोगिता सम्पन्न गर्न १२ लाख रुपैयां खर्च अनुमान गरिएको प्रतियोगिता व्यवस्थापन समितिका सुरेन्द्र शाक्यले बताए ।
बुटवल उपमहानगरपालिकाले प्रतियोगिताका लागि एक लाख रुपैयां सहयोग गरेको छ ।
