मनलाई स्थिर राख्न र तनावबाट मुक्त हुनका लागि योग

काठमाडौं , आज मुलुकभर ‘राष्ट्रिय एकताः योगको सान्दर्भिकता’ भन्ने मूल नाराका साथ पाँचौँ राष्ट्रिय योग दिवस देशभर विभिन्न कार्यक्रम गरी मनाइएको छ ।
परराष्ट्रमन्त्री प्रदीपकुमार ज्ञवालीले योगलाई जीवन अभिन्न अङ्ग बनाउनुपर्ने बताउनु भएको छ । राष्ट्रिय योग मूल समारोह समितिले आयोजना गरेको राष्ट्रिय योग दिवस, मकर सङ्क्रान्ति मूल समारोह कार्यक्रममा उक्त कुरा बताउनु भएको हो । उहाँले योगले मानिसको वास्तविक जीवनशैली अपनाउन सहयोग गर्ने बताउनु भयो ।

उहाँले आधुनिकतासँग समाजमा थुप्रै तनाव बढेको भन्दै त्यसलाई कम गर्नका लागी योग, ध्यान र विपश्यना नै उपयुक्त माध्यम भएको बताउनु भयो । उहाँले निरोगी, शान्त र सौहार्दपूर्णरूपमा जीवनका लागि योग नै रहेको उल्लेख गर्नु भयो । उहाँले योगलाई विद्यालय तहको पाठ्यक्रममा समावेश गर्नुपर्ने बताउनु भयो । आधुनिक चिकित्साले उपचार नभएको बेला प्राकृतिक चिकित्साअन्तर्गत योग गरेर नै हाम्रा पुर्खाले उपचार गरेको उहाँको भनाइ थियो ।

स्वास्थ्य तथा जनसङ्ख्यामन्त्री भानुभक्त ढकालले सरकार रोग लाग्न नदिने अभियानमा रहेको बताउनुभयो । उहाँले योग, ध्यानजस्ता प्राकृतिक उपचारलाई आफूले प्राथमिकतामा राखेको बताउनु भयो ।
शिक्षा, विज्ञान तथा प्रविधिमन्त्री गिरिराजमणि पोखरेलले प्राकृतिक चिकित्सा र योग शिक्षालाई आगामी शैक्षिकसत्रदेखि विद्यालय तहमा समेट्ने बताउनु भयो । उहाँले योगलाई नै प्राथमिकतामा राखेर सरकारले योगमाया आयुर्वेद विश्वविद्यालय स्थापनाका लागि संसद्को हिउँदे अघिवेशनमा विश्वविद्यालयसम्बन्धी विधेयक दर्ता गर्ने बताउनु भयो । उहाँले योगलाई सप्ताहरूपमा नभएर वर्षभित्र अभियानका रुपमा सञ्चालन गर्ने तयारीसमेत भएको बताउनु भयो ।

कार्यक्रममा पतञ्जलि योग समितिका अध्यक्ष सुर्दशन सुवेदीले मनलाई स्थिर राख्न र तनावबाट मुक्त हुनका लागि योग गर्नुपर्ने बताउनु भयो । स्वामी आनन्द अरुण गौतम बुद्ध जन्मेको दिनलाई योग दिवस मनाउनुपर्ने बताउनु भयो । ब्रह्मकुमारी कुसुमले योगले जीवनलाई सुखी बनाउने बताउनुभयो । आर्ट अफ लिभिङका अच्युत गौतमले योगलाई माध्यमिक तहसम्मको शिक्षामा समावेश गर्नुपर्ने बताउनु भयो ।

सोही अवसरमा योग क्रियाकलाप कसरी गर्ने भन्नेबारेमा मन्त्रालयद्वारा गठित राष्ट्रिय योग अभ्यासक्रमका संयोजक सोनाम साथीले मन्त्री पोखरेललाई योगाभ्यास पुस्तिका हस्तान्तरण गर्नु भएको थियो । पुस्तिकामा योगाभ्यासका चरणहरु उल्लेख गरिएका छन् ।

यसैगरी समारोहको सक्रियतामा बिहान प्रभातफेरी गरिएको थियो । पद्मोदय माध्यामिक विद्यालयबाट शुरु भएको प्रभातफेरी पुतलीसडक, बागबजार, रत्नपार्क हुँदै राष्ट्रिय सभागृहमा आएको थियो । प्रभातफेरीमा योगसँग सम्बन्धित सङ्घसंस्थाको सहभागिता रहेको थियो । सरकारले प्रत्येक माघ १ गतेलाई योग दिवसका रुपमा मनाउँदै आइरहेको छ ।