काठमाडौं , सत्तारुढ दल नेपाल कम्युनिष्ट पार्टी नेकपाका वरिष्ठ नेता एवम् पूर्वप्रधानमन्त्री झलनाथ खनालले पत्रकारको हितमा केन्द्रित भएर सूचना, प्रविधिसम्बन्धि आवश्यक ऐन, कानून निर्माण गर्न सरकारलाई सुझाव दिनु भएको छ ।
वरिष्ठ नेता खनालले सूचना प्रविधिको क्षेत्रमा सुधार ल्याउन चीन र भारत दुबै छिमेकी मुलुकसँग आवश्यक छलफल गर्न ढिलाई नगर्न पनि सरकारको गम्भीर ध्यानाकर्षण गराउनु भयो । बिहीबारबाट काठमाडौंको टुँडिखेलमा सुरु भएको ‘दोसो अन्तर्राष्ट्रिय प्रिन्टिङ, फोटोग्राफी एण्ड मिडिया टेक्नोलोजी एक्स्पो’को उद्घाटन गर्दै उहाँले सूचना र प्रविधिको क्षेत्रको विकास गरेर मात्रै मुलुकको समृद्धि हुने भएकाले त्यसको विकासमा सरकार केन्द्रित हुनुपर्ने पनि स्पष्ट पार्नु भयो ।
वरिष्ठ नेता खनालले सूचना र प्रविधिको विकास गर्दा मुलुकको राष्ट्रियतालाई सुदृढ बनाउने विषयमा पनि सरकारले ख्याल गर्नुपर्ने जरुरी रहेको बताउनु भयो । सूचना र प्रविधिको क्षेत्रमा नयाँ नयाँ प्रविधि भित्र्याउने उद्देश्यका साथ सो एक्स्पो आयोजना गरिएको नेपाल फोटो पत्रकार महासंघका महासचिव हरि रेग्मीले जानकारी दिनु भयो । एक्स्पोमा नेपालको लोकतान्त्रिक आन्दोलनका झलकहरु समावेश गरिएको फोटो, नेपालको प्राकृतिक तथा सांस्कृतिक रुपले मनोरम दृष्यहरुलाई कैद गरिएका फोटोहरुलाई मुख्य आकर्षणको रुपमा राखिएको छ ।
नेपाल मुद्रण उद्योग महासंघको समेत सहभागितामा आयोजना गरिएको ३ दिने एक्स्पोमा प्रिन्टिङसम्बन्धि सामग्रीहरु, फोटो र फोटाग्राफीका लागि आवश्यक नयाँ नयाँ प्रविधिहरु पनि राखिएका छन ।
