कात्तिक ७, काठमाडौं । प्रधानमन्त्री शेरबहादुर देउवा र नेकपा माओवादी केन्द्रका अध्यक्ष पुष्पकमल दाहालबीच मुलुकको पछिल्लो राजनीतिक अवस्था र प्रतिनिधिसभा तथा प्रदेशसभा निर्वाचनको तयारीका बारेमा छलफल भएको छ ।
प्रधानमन्त्री निवास बालुवाटारमा मंगलबार भएको भेटवार्तामा निर्वाचनको तयारीका बारेमा सरकारले गरिरहेको काम–कारबाहीका बारेमा छलफल भएको थियो । भेटमा प्रधानमन्त्रीले देउवाले तोकिएको मितिमा नै प्रतिनिधिसभा र प्रदेशसभाको निर्वाचन गराउन सरकार प्रतिबद्ध रहेको र त्यसमा कुनैपनि आशंका नगर्न आग्रह गरे ।
अध्यक्ष दाहालका प्रेस संयोजक मनोहरि तिमिल्सिनाका अनुसार माओवादी केन्द्रका तर्फबाट सरकारमा सहभागी मन्त्रीहरु बिनाविभागीय भएपछिको अवस्थाको बारेमा समेत कुराकानी भएको थियो । अध्यक्ष दाहालले सरकारमा सहभागी आफ्नो पार्टीका मन्त्रीले छाडिदिने जानकारी प्रधानमन्त्रीलाई गराएका थिए ।
‘सरकारलाई अप्ठ्यारो पार्ने उद्देश्य हाम्रो छैन, निर्वाचनको सुनिश्चितता नै प्रमुख प्रश्न हो, हामी त्यसमा प्रतिबद्ध छौं’–अध्यक्ष दाहालले भनेको कुरा उद्धृत गर्दै प्रेस संयोजक तिमिल्सिनाले जानकारी दिए । भेटमा निर्वाचनलाई शान्तिपूर्ण एवं भयरहित बनाएर लैजान सबै पक्ष मिलेर जाने विषयमा समेत छलफल भएको थियो । रासस
